ഏഷ്യാനെറ്റിൽ സംപ്രേക്ഷണം ചെയ്തിരുന്ന “ബഡായി ബംഗ്ലാവ്” എന്ന പരിപാടിയിലൂടെ മലയാളികൾക്ക് സുപരിചിതയായ താരമാണ് ആര്യ. മികച്ച അവതാരകയായ ആര്യ നിരവധി സിനിമകളിൽ അഭിനയിച്ചിട്ടുമുണ്ട്. ബിഗ് ബോസ് സീസൺ 2വിൽ മത്സരാർത്ഥിയായി എത്തിയതോടെ ആര്യയെ കുറിച്ച് പ്രേക്ഷകർ കൂടുതൽ അറിഞ്ഞു. ആര്യ പങ്കുവെച്ച ഏറ്റവും പുതിയ ഫോട്ടോഷൂട്ട് ചിത്രങ്ങൾ ആണ് ഇപ്പോൾ സമൂഹമാധ്യമങ്ങളിൽ ശ്രദ്ധേയമാകുന്നത്. “നിങ്ങൾ തന്നെയാണ് നിങ്ങളുടെ പരിമിതി” എന്ന അടിക്കുറിപ്പോടെ ആണ് താരം ചിത്രങ്ങൾ പങ്കുവെച്ചത്.
ചിത്രങ്ങൾക്ക് താഴെ ഒരുപാട് ആളുകൾ വിമർശനവുമായി എത്തിയിട്ടുണ്ട്. പല കമന്റുകൾക്കും തക്കതായ മറുപടി താരം നൽകുന്നുണ്ട്. ചിത്രത്തിനു താഴെ “പാന്റ്സ് മുഖ്യം ബിഗിലേ ..സോറി ആര്യ” എന്ന കമന്റ് ഇട്ട ആളോട് “നിക്കർ ഉണ്ട് ബിഗിലെ, സോറി ആര്യൻ” എന്നാണ് ആര്യ നൽകിയ മറുപടി. ഇതിനു മുമ്പും തന്റെ ബോൾഡ് ലുക്കിലുള്ള ഫോട്ടോഷൂട്ട് ചിത്രങ്ങൾ താരം സമൂഹമാധ്യമങ്ങളിലൂടെ പങ്കുവെച്ചിരുന്നു . അതിനും ഒരുപാട് വിമർശനങ്ങളും പിന്തുണയും താരത്തിനു ലഭിച്ചിരുന്നു .
ബിഗ് ബോസിൽ എത്തിയപ്പോൾ ആര്യ തന്റെ കുടുംബജീവിതത്തെ കുറിച്ച് തുറന്നു പറഞ്ഞിരുന്നു. മിനി സ്ക്രീനിലും ബിഗ് സ്ക്രീനുകളും പ്രേക്ഷകരെ തമാശകൾ പറഞ്ഞു ചിരിപ്പിച്ച ആര്യയുടെ മറ്റൊരു മുഖമാണ് ബിഗ്ബോസിൽ പ്രേക്ഷകർ കണ്ടത്. ബിഗ് ബോസിന് ശേഷം കടുത്ത വിമർശനങ്ങൾ സമൂഹമാധ്യമങ്ങളിലൂടെ താരത്തിനെതിരെ ഉയർന്നിരുന്നു. എന്നാൽ വിമർശനങ്ങൾക്ക് ഒന്നും മറുപടി നൽകാതെ തന്റെ നിലപാടുകളിൽ ഉറച്ചു മുന്നോട്ടുപോവുകയാണ് താരം.
നടി അർച്ചന സുശീലന്റെ സഹോദരനായ രോഹിത് സുശീലൻ ആയിരുന്നു താരത്തിന്റെ ഭർത്താവ്. വിവാഹ ബന്ധം വേർപെടുത്തിയ ഇവർ നല്ല സുഹൃത്തുക്കളാണ് ഇപ്പോൾ. ആര്യയുടെ മകൾ റോയയും ഇപ്പോൾ ഒരു കുഞ്ഞു സെലിബ്രിറ്റിയാണ്. മകൾ അച്ഛനോടൊപ്പം അവധിക്കാലം ആഘോഷിക്കാൻ പോകുന്ന ചിത്രങ്ങളെല്ലാം സമൂഹമാധ്യമങ്ങളിൽ ശ്രദ്ധേയമായിരുന്നു. സമൂഹമാധ്യമങ്ങളിൽ ഏറെ സജീവമായ ആര്യ തന്റെ വിശേഷങ്ങൾ എല്ലാം ആരാധകരുമായി മുടങ്ങാതെ പങ്കുവയ്ക്കാറുണ്ട്. ആര്യ പങ്കുവെക്കുന്ന പോസ്റ്റുകൾ എല്ലാം ആരാധകർ ഏറ്റെടുക്കാറുമുണ്ട്. നടി എന്നതിനേക്കാളുപരി മോഡലായും ആര്യ സജീവമാണ്.