സിനിമ- സീരിയൽ താരങ്ങളുടെ വിശേഷങ്ങൾ അറിയാൻ മലയാളികൾക്ക് എന്നും കൗതുകമാണ്. കഴിഞ്ഞ ദിവസം സമൂഹ മാധ്യമങ്ങളിൽ നിറഞ്ഞു നിന്നിരുന്നത് പ്രശസ്ത സംവിധായകൻ ശ്രീജിത്തിന്റെയും നടി റബേക്കയുടെയും വിവാഹ ആഘോഷങ്ങളുടെ വിശേഷങ്ങൾ ആയിരുന്നു. ഒരു സ്വകാര്യ ഹോട്ടലിൽ വെച്ചായിരുന്നു ഇവരുടെ വിവാഹം. നിരവധി സിനിമ- സീരിയൽ താരങ്ങൾ ആയിരുന്നു ഇവരുടെ വിവാഹത്തിൽ പങ്കെടുത്തത്. ഇവരുടെ വിവാഹ ചിത്രങ്ങളും വീഡിയോയും സമൂഹ മാധ്യമങ്ങളിൽ വൈറൽ ആയിരുന്നു.
അഞ്ചു വർഷത്തെ പ്രണയത്തിന് ശേഷമാണ് ഇവർ ഒന്നിക്കുന്നത്. കഴിഞ്ഞ വർഷം ഫെബ്രുവരി 14നായിരുന്നു താരദമ്പതികളുടെ വിവാഹ നിശ്ചയം. സലിംകുമാർ, നമിതപ്രമോദ്, ഹരീഷ്, ധർമജൻ തുടങ്ങി നിരവധി സിനിമാതാരങ്ങൾ വിവാഹത്തിൽ പങ്കെടുത്തിരുന്നു. നീല ബോർഡറുള്ള ക്രീം നിറമുള്ള വിവാഹ സാരിയിൽ അതീവ സുന്ദരിയായിട്ടാണ് റബേക്ക പ്രത്യക്ഷപ്പെട്ടത്. വിവാഹത്തിന് നൃത്തം ചെയ്‌ത്‌ ആഘോഷിക്കുന്ന റബേക്കയുടെ ദൃശ്യങ്ങൾ നിമിഷനേരം കൊണ്ട് ആണ് സമൂഹ മാധ്യമങ്ങളിൽ ശ്രദ്ധേയമായത്.
ഇപ്പോഴിതാ വിവാഹപ്പിറ്റേന്ന് ഉള്ള രസകരമായ ഒരു വീഡിയോ പങ്കു വെക്കുകയാണ് സംവിധായകൻ ശ്രീജിത്ത്. അതിരാവിലെ ഉറക്കം ഉണരാൻ മടിക്കുന്ന റബേക്കയുടെ വീഡിയോ ഇൻസ്റ്റാഗ്രാമിലൂടെ ആണ് ശ്രീജിത്ത് ആരാധകരുമായി പങ്കു വെച്ചത്. “വിവാഹ സങ്കൽപം വേർഷൻ 2” എന്ന കുറിപ്പോടെ പങ്കു വെച്ച രസകരമായ വീഡിയോ ഏറ്റെടുത്തിരിക്കുകയാണ് ആരാധകർ. ആഘോഷങ്ങളുടെ ക്ഷീണം മാറാതെ ഉറങ്ങുന്ന റബേക്കയോട്, എട്ടു മണിയായി എന്നും കല്യാണപ്പെണ്ണ് രാവിലെ എഴുന്നേറ്റ് ഒരു കപ്പ് കാപ്പിയുമായി സെറ്റും മുണ്ടും ഉടുത്ത് ഭർത്താവിന്റെ അരികിലേക്ക് വരുന്നതാണ് കേരള സങ്കൽപം എന്ന് ശ്രീജിത്ത് പറയുന്നു.
ശ്രീജിത്തിന്റെ രസകരമായ ഉപദേശത്തിന് താഴെ ഇരുവരുടെയും സുഹൃത്തുക്കൾ കമന്റുകളുമായി എത്തിയിട്ടുണ്ട്. പാവം എന്ന കമന്റ് നടി അലീന പടിക്കൽ പങ്കു വെച്ചപ്പോൾ പണി കിട്ടി ചേച്ചി എന്നായിരുന്നു റബേക്കയുടെ മറുപടി. “കുഞ്ഞിക്കൂനൻ” എന്ന പരമ്പരയിലൂടെ ബാലതാരമായി അഭിനയരംഗത്തേക്ക് ചുവട് വെച്ച താരം ആണ് റബേക്ക സന്തോഷ്. 2012ൽ പത്മകുമാർ സംവിധാനം ചെയ്ത “തിരുവമ്പാടി തമ്പാൻ” എന്ന ചിത്രത്തിലെ ചെറിയ വേഷത്തിലൂടെ മലയാള സിനിമയിലെത്തിയ താരം, “കസ്തൂരിമാൻ” എന്ന പരമ്പരയിലൂടെയാണ് പ്രേക്ഷകരുടെ പ്രിയങ്കരിയായി മാറിയത്.
പരമ്പരയിലെ കാവ്യ എന്ന വക്കീലിന് മികച്ച സ്വീകാര്യത ആണ് പ്രേക്ഷകരിൽ നിന്നും ലഭിച്ചത്. അഭിനയത്തിന് പുറമേ അവതാരക കൂടിയായ റബേക്ക, സീ കേരളത്തിൽ സംപ്രേഷണം ചെയ്ത സരിഗമപാ എന്ന ജനപ്രിയ മ്യൂസിക് റിയാലിറ്റി ഷോയിൽ അവതാരകയായി തിളങ്ങിയിരുന്നു. കുഞ്ചാക്കോ ബോബൻ നായകനായ “കുട്ടനാടൻ മാർപാപ്പ”, “മാർഗംകളി” എന്നീ ചിത്രങ്ങളുടെ സംവിധായകൻ ആയ ശ്രീജിത്തും റബേക്കയും ദീർഘകാലമായി പ്രണയത്തിലായിരുന്നു . സമൂഹമാധ്യമങ്ങളിൽ വളരെ സജീവമായിട്ടുള്ള റബേക്ക ഇവരുടെ പ്രണയത്തെ കുറിച്ച് നിരവധി തവണ പരസ്യമായി വെളിപ്പെടുത്തിയിട്ടുണ്ട്.
ഇവരുടെ വിവാഹ നിശ്ചയ ചടങ്ങിൽ കുഞ്ചാക്കോ ബോബൻ, സലിം കുമാർ, ദിനേശ് പ്രഭാകരൻ, കൃഷ്ണപ്രിയ തുടങ്ങി നിരവധി സിനിമാ സീരിയൽ താരങ്ങൾ പങ്കെടുത്തിരുന്നു. “കസ്തൂരിമാൻ” എന്ന പരമ്പരയിലെ കാവ്യ- ജീവ ജോഡികൾ പ്രേക്ഷകർക്ക് ഏറെ പ്രിയപ്പെട്ടതായിരുന്നു. സമൂഹ മാധ്യമങ്ങളിൽ ഇവരെ പിന്തുണച്ച് നിരവധി ഫാൻ പേജുകൾ തന്നെ ഉണ്ടായിരുന്നു. വളരെ ശക്തമായ കാവ്യ എന്ന കഥാപാത്രത്തെ അനായാസം ആയിട്ടായിരുന്നു റബേക്ക കൈകാര്യം ചെയ്തത്.
